لنا صديقه من نجع حمادي
قالت انها ........
اللى هقوله دة رسالة تعزية لكل الناس
لازم توصل وتسرى وسطينا
رحت اعزى انهرده زمايلى اخوات الشهدا لأنهم فى نفس سنى تقريباً
انا زرت تلات بيوت
وكل بيت كنت بدخله كنت باخد شحنة تعزية وفرح مالهاش مثيل ومعرفش اوصفهالكم بجد
***********
اللى فرحنى فعلاً هو كم الفرح والتعزية اللى فيهم وملياهم
بيت الشهيد ابانوب كمال
شافوا الست العدرا
واقفة فوق الصناديق اثناء الصلاة فى شكل حمامة كبيرة
وكمان شافوا نفس الحمامة معدية عند البيت تلات مرات رايحة جاية
ومن وقتها حاسين بسلام وفرح مش عاوزة اقولكم
فى البيت شكلهم ازاى
بيت الشهيد بولا عاطف
مامته شافتهم كلهم فى حلم لابسين ابيض وفرحانين
وقالها ان فرحان ياماما ومبسوط جداً هنا
وقالها بصى الجلابية بتاعتى مفيهاش بقع زى اصحابى
علشان انتى فرحانة ومش بتبكى
والبيت هناك عامل زى الكنيسة
ومامة بولا قالتلنا انها بعد ماسيدنا صلى صلاة التالت
قامت زغرتت لانها بتقول كنت حاسة انى بحضر فرح بولا مش صلاة على روحه
قامت زغرتت من الفرحة
بيت الشهيد بيشوى فريد
فرحانين جداً لان بيشوى كان خادم جميل وكمان اعترف واتناول قبل مايقابل المسيح
وكانت فى حياته على الارض زى الملاك
وهما شافوا الشهدا فى حضن الست العدرا
تفتكروا بعد دة كله كان ممكن ابقى ازاى
انا بجد فرحانة جدا رحت اعزيهم انا اللى اتعزيت
ربنا باعت تعزية رااااااائعة وجميلة لقلوبهم
والعدرا الحنونة مش سايباهم
************
والسما مش سايبانا ولا ناسيانا
كل الفترة اللى عدت من يوم ليلة العيد
والسما ساندانا
والعدرا معانا بتحرسنا
طفت حرايق كتير وانقذت ناس من الموت
واقفة بتحرسنا وبتحمينا
العدرا وكل القديسين موجودين فى نجع حمادى
لولاهم احنا كنا تعبنا كتير
رب المجد مش ناسينا ولا سايبنا
رب المجد بيحبنا ولو مش بيحبنا مكنش بعتلنا الضيقة الجميلة دى
ضيقة شبعتنا وفرحتنا وجمعتنا كلنا بقلب واحد
ضيقة حركتنا وغيرتنا ومازالت
شكرا يا الهى على كل شىء
واثقين انك معانا
وحامينا
ان اخدوا جسدنا روحنا فايدك ومحدش يقدر ينزعها منك
متخفوووووووووووووووووووش
ربنا موجود
الثلاثاء يناير 12, 2010 1:30 pm